Er að horfa á alþingi í TV. Á hvaða trippi er hið háa alþingi???

Nú blöskrar mér.

Einar H. Guðfinnsson sem brilleraði svo vel í liðinni viku með því að auka þorskveiðikvótann ákkurat á þeim tíma sem verð á þorski er í lágmarki og frystigeymslur eru að fyllast af bolfiski.

Nú er greinilega brýnast að koma í gegn frumvarpi, sem ýtir undir meira atvinnuleysi í landbúnaði. Svo hægt sé að flytja meira inn af keti og landbúnaðarvörum, sem við hefðum ekki getað leyst út.

Ráðherra skal falið vald í auknum mæli samkvæmt þessu frumvarpi. Framsal valds.

Er ekki í lagi með fólk??? Ég bara spyr?

Ef Jón Baldvin og co hefðu fengið sínu fram um óheftan innflutning á landbúnaðarafurðum, þá er næsta víst að ekki væri mikið að éta hér á landi í ástandinu í dag, við ættum ekki gjaldeyri til að leysa það út.

Þessi EES samningur um allt þetta óhefta flæði hefur ekki verið að skila okkur mikilli gæfu, samanber hið óhefta flæði fjármagns.

Mér hrýs hugur við því ef það er satt að Jón Baldvin ætli að rísa upp af pólitískum dauða. Nú gargar hann sig hásann, snillingurinn sem byggði grunninn að kreppunni blindaður af EES. Ég vona að hann hvíli í friði sem lengst og til hans fari sem flestir sitjandi forystumenn í og haldi sig frá þvi að stjórna landsmálunum. Þeirra tími er liðinn. Fyrirheitna landið EB virðist ekki vera að brillera i dag. Írar vilja úr því aftur t.d.

Veit ekki hvort ég á að hlæja eða gráta satt að segja.

Eru ekki brýnni mál sem þarf að ræða OG TAKA Á á hinu háa alþingi?? Spyr ég einn úr sauðsörtum almúganum.

Ætla að vona að fólk sýni hug sinn í verki.

Vona svo sannarlega að fólk segi upp árskriftinni að svona skrípafjölmiðli. Þetta að þeirra eigin sögn flaggskip frjálsrar fjölmiðlunar sýnir sitt rétta andlit núna. Stjórnendurnir vildu láta ríkisfjölmiðlana leggja upp laupana svo þeir gætu sinnt frjálsri fréttamennsku. Gef ekki meira fyrir það en innihald IDOLSINS. Meira að segja voru IDOL stjórnendur farnir að sjá um hvað af menningunni átti að fá styrki úr bönkunum. Veit að Landsbankinn var með einn slíkan.

Guði sé lof að menn sáu að sér áður en Ríkisútvarpið, íbúðalánasjóður og restin af heilbrigðiskerfinu hvarf í hít græðginnar.

Kompás lagður niður

Áhyggjur.

Ég hef verulegar áhyggjur af þessu, ég verð að segja það.

Ég vil þakka morgunblaðinu fyrir að deila þessu með okkur, aldeilis gott innlegg í umræðuna hér á landi í dag. Ég satt að segja veit ekki hvernig mér hefði reitt af án þessara þörfu upplýsinga.

Vona líka að sömu örlög bíði ekki blaðsins sjálfs, þ.e.a.s. að það verði ekki dregið sem rekald til síns heima ......óselt.

Enginn vill kaupa lúxussnekkju Saddams

Lögreglumenn ekki öfundsverðir, ég vil koma því að, að þeir eiga minn skilning.

Ég hef áhyggjur. Skálmöld runnin upp.

Mikil umskipti frá ofgnóttinni sem var. Kemur mér á óvart að sjá suma mótmælendur sem voru á kafi í sukkinu, leika fórnarlömb í dag.

Hverjum er að treysta? Ögmundi skjálfandi á beinunum? Helgu Harðar bölvandi í ræðustóli? Stjórnarklaninu? Stjórnarandstöðunni?

Ég veit það ekki. Ég veit bara það að skemmdarverk, skera á dekk, brjóta rúður og ögrun við lögreglu skilar engu. Ég hef sagt það áður hér, ég hef reynt hvað það er að missa allt mitt einu sinni og ástandið er að éta upp það litla sem ég á.

Það er ekki þannig að allir hafi verið eins og í sunnudagaskóla í dag. Lögreglan er ekki að leika sér. Hún hefur það hlutverk að tryggja ákveðið skikk í samfélaginu.

Þessir fáu ögrandi og eyðileggjandi mótmælendur eru að eyðileggja fyrir hinum, sem eru að koma sínum skilaboðum á framfæri, það er hægt án þess að hlutirnir gangi of langt.

Lögreglan er að vinna sína vinnu.

Við þurfum tíma til að stilla upp nýjum valkostum. Til hvers að kjósa strax núna? Til að koma Steingrími J. með engar lausnir að kötlunum. Nei takk.

Málefnalegur undirbúningur til framtíðar er eitthvað sem ég vildi sjá.

 

Átta ára blessað barn.

Sjálfsagt falleg stúlka með fallega nafnið sitt. En að láta 8 ára barn standa í þessum sporum finnst mér sorglegt.

Mér verður hugsað til Palestínu, Afghanistan, Afríku og Hitlersæskunnar, hvar börn og unglingar voru heilaþvegin.

Að draga börn inn í þessa gremjuöldu, upplifi ég sem alvarlegri hlut, en þó þessa kreppu. Við höfum upplifað allslags kreppur í þessu landi, en til þessa höfum við virkjað okkar orku til góðra verka, en ekki til niðurrifs og beiskju. Hugarfar fórnarlambsins hugnast mér ekki.

En að taka þátt í að ræna 8 ára barni æsku sinni, er það eitthvað sem við viljum?

 

Mótmælaróður hertur

Froðusnakk

Ragnars Reykáss ímynd forsetans verður alltaf sterkari.

Mér finnst fara honum best að vera á ljósmynd, eða í sjónvarpi án hljóðs.

Þjóðarátak nýrrar sóknar

Eitt á enda ár vors lífs er runnið.

Já eitt ár enn. Það er þakkarvert. Jafnvel þótt gefi á skútuna. Við þekkjum það sjómenn að stundum geysa stormar og hretviðrin hörð, stórsjórir og bylgjur rísa og hníga. En alltaf lægir að lokum og birtir upp. Það er lögmál.
Vitanlega er leitt hvernig komið er fyrir efnahag þjóðarinnar. Þar er mörgu um að kenna, eins og allar elfur hafi runnið að þeim ósi sem þjóðin býr við í dag.
Það hlaut að koma að skuldadögum. Kom mér ekki á óvart. En slíku ástandi verður að taka með æðruleysi. Þjóðin okkar hefur séð það svartara.
Ég tek á móti upphafi árs í upphafi sjóferðar yfir hafið. Síðasti túr skipsins var í brjáluðum veðrum allan tímann. Eitthvað af farmi varð fyrir skaða vegna þess. Menn mættu því ekki með því að missa móðinn. Heldur var haldið áfram að sigla og túrinn kláraður. Málið leyst. Nú er annar túr í góðu leiði.
Ég hef upplifað þetta eins og þjóðin sé líkt og fjölskylda, sem þarf að taka á vanda sem skapast af stjórnleysi innan fjölskyldunnar, óreglu og óráðsíu.
Lausnin felst ekki í því að velta sér upp úr orðnum hlut, nú eða afneitun, heldur að reyna að leysa málin af æðruleysi. Ekki með fordæmingum, og hvatvísi. Við verðum að skilja að við erum öll mannleg og öllum getur orðið á. Ég óska minni þjóð þess að hún nái að skilja kjarnann frá hisminu og hafi úthald og visku til að bera, svo að við getum haldið áfram að lifa í þessu góða landi í sátt og vonandi lært af fenginni reynslu, hvernig best er að verjast áföllum í næstu óveðrum.
Vona að fyrir stafni sé gott ár til sjávar og sveita, og við missum ekki móðinn. Gleðilegt ár og þakka liðið.

Illa unnin frétt.

Mogginn má muna sinn fífil fegri.

Fréttir oftar en ekki illa unnar, líkt og þessi hér.

Togarinn heitir Ásbjörn það er rétt, en svo heitir hann Ásgeir neðar í fréttinni, en sem betur fer er skipið réttnefnt undir lok þessarar fréttar.

Hólsberg veit ég ekki hvar er, en Hólmsberg er í utanverðum Stakksfirði, og er á milli Keflavíkur og Leiru í sunnanverðum Faxaflóa.

Er Mogginn farinn að ráða fólk sem ekki veldur starfanum? Eða er ekki haldið utan um vönduð vinnubrögð?

Með fullfermi til Þýskalands

Halló, þarf ekki fyrst að klára frumvarpið?

Er fólk alveg að tapa sér?

Nægur er nú skaðinn samt. Við þurfum fjárlög til að halda öllu dæminu gangandi. Að bera á borð þau rök að fjárlögin séu aðför að fullveldi landsins finnst mér óskiljanlegt.

Ég er örugglega ekki sá eini sem hef þurft að vinna hörðum höndum fyrir mínu, og geri það enn. Ég kæri mig ekki um að verið sé að auka við skaðann, sem er skeður, með svona leik. Einn aðal nestor mótmælenda sagði á fyrstu dögum hrunsins að AGS væri eina leið okkar út úr þessum ógöngum, þar væru einu mennirnir með þekkinguna til að ráleggja okkur heilt, og núna á að bera brigður á það.

Eins og ég hef reynt að stilla mig um að blogga um þetta ástand, sem ekki er búið að greina til fulls. Þá bara stenst ég ekki mátið.

Að koma með þessa áskorun fyrirfram áður en málið fer til 3. umræðu og afgreiðslu er meira skylt gríni en alvöru. Þetta er ekki herkænska sem er að virka.

Forseti hafni fjárlagafrumvarpi

Dómstóll götunnar

Ef þetta er það sem koma skal, svona hátterni, þá er þetta EKKI samfélag sem mig langar að búa í. Það styttist í að upp úr sjóði með þessu áframhaldi.

Það er ekki hægt að leysa nein mál með svona mótmælum. Umræða eins og í Háskólabíó um daginn er eitthvað sem hugnast mér betur. Þar sem fólk gat talað út úr sínu hjarta og komið á framfæri sinni sýn af sannleikanum.

 Við búum í litlu samfélagi, sem vissulega fór fram úr sjálfu sér. En maður greiðir ekki flækju með því að búa til öðruvísi flækjur.  Það tekur nógu og langan tíma samt, að reyna að fá einhvern botn í þessi mál.

 

Þingfundur hafinn á ný